上星期二出尖沙咀，走去買啲唔等使嘅東東，心血來潮之下，做咗個小小嘅直播。原來有啲嘢，你唔親身體驗過，都唔知自己有幾多斤兩。我寫嘅文章，已經夠難明，至於直播呢？哈哈！就連我自己都唔敢睇返。ANYWAY，有時候試下啲新嘢，都幾有趣味。各位如果有 GOOGLE 帳號嘅話，希望你地都支持一下，訂閱我嘅 YOUTUBE 頻道。話說儲夠 1,000 個訂閱者，就會開啟一啲新 FEATURES，例如可以發社群貼文，咁我就可以將文章同時發放去 YOUTUBE 度。
不過我呢個二打六，莫講話搵 1,000 個 SUBSCRIBERS，就算喺 100 個都難。記得以前我寫文章，閒閒地幾萬瀏覽人次，而我就為咗所謂「寧人負我，莫我負人」呢個騎呢原則，離棄咗唔知幾多喜歡睇我文章嘅人。過咗近兩年嘅冷河之後，再轉埋個平台，換返嚟嘅，就喺一個無包袱嘅寫作環境，可謂有得亦有失。俾著以前，我邊會咁大膽，走出街去玩直播？冇乜人睇，又冇人知我乜水，自然就可以玩大啲啦！
口罩疑雲
果日我响尖沙咀，經過一間藥房，隨手 $398 就買咗盒 50PCS 嘅口罩。果區啲藥房，根本就大把貨，亦唔見有人排隊買。其實坊間講嘅所謂缺口罩，只不過喺價錢問題，但就搞到好多人以為市場真喺冇哂貨。我唔喺講笑，三日後，即喺上星期五，我再路經尖沙咀，見到啲藥房，咪一樣大把貨，價錢仲跌咗添，$360 一盒。
唔知大家覺得，$360 一盒口罩，抵唔抵買？同疫情之前個價，當然喺冇得比，但如果你講到性命攸關咁大件事，堅持一定要一日消耗一個口罩嘅話，你為咗保住自己條命，每日洗多七至八蚊雞，咁都唔捨得？响香港地，弱勢社群，總會有人接濟，但如果你俾得起，做乜仲要天寒地凍，凌晨時分，走去排大隊，唔病都搞到病，究竟自己條命矜貴啲，定喺個口罩矜貴啲？
THAT'S WHY 你政府玩招標，價低者得，當然喺買唔到貨，葉劉話做法愚蠢，真喺寸得夠型。不過唔知點解，轉個頭啫，佢又話政府要管制口罩價格喎！本來自由市場，需求推動價格，價格壓抑需求，口罩問題總會解決，但妳好搞唔搞，走去管人地個價，即喺叫佢地唔好入貨，到時就喺真缺貨，而唔喺假缺貨，你有錢都買唔到啦！呢一招，同招標一樣咁愚蠢，真喺唔知葉劉邊句真。無他嘅，政客講嘢，自相矛盾，司空見慣啦！
防疫在於市民
講真，全民戴口罩，都只不過喺預防性質，盡量封殺病毒嘅某啲傳播方式，呢個喺群眾策略，令病毒寸步難行。所以就算有啲人，唔戴口罩出街，中招嘅風險都喺非常之低，唔好講到冇口罩出街，就好似攞命搏咁。除非全港大部分地區嘅空氣，都已經佈滿呢隻病毒，但如果真喺咁，你戴口罩都唔會有用。
所以我依家戴口罩出街，主要都喺費事俾人歧視，多過真喺為咗防疫。其實所謂全民防疫，大家做得幾多就做幾多，隻病毒已經夠冇運行，唔一定執著人地要做到幾足。你唔夠口罩，咪慳啲洗囉！去人流稀疏，或者空曠嘅地方，唔一定要戴啫。最重要喺平常心，切忌 OVER-REACT，皆因恐慌嘅傷害，仲大鑊過疫情本身。
防疫最大嘅責任，喺响市民度，而唔喺响政府度。政府一定有方案應對，但無論任何方案，都冇可能順得哂所有人，你要反對，一定搵到理由。全民自律防疫，比任何政策更有效，而最重要嘅，就喺包容。當然，冇人會鍾意個隔離或檢疫中心，起响自己屋企附近，但唔等於咁就可以去搞搞震，仲招惹埋啲黃黑瘟神過嚟幫拖。正月流流 CALL 瘟神，來年仲邊會有運行？
外匯基金嘅啟示
我地中國人，好重視農曆新年，一年之首，喜氣洋洋，互相恭賀，你好我好，以一個正面、歡樂，同充滿希望嘅心態，迎接新一年嘅來臨，正月儲滿正能量，就無懼來年嘅新挑戰。我之所以响過年之前，趕起《核彈篇》，就喺唔想將個咁衰嘅系列名跨過年。當時撞正金管局啱啱出成績表，未嚟得切好似《投資篇》咁，攞嚟做題材。上年度外匯基金賺 2,472 億，僅次於 2017 大旺市果年，真喺可喜可賀。我根據金管局 2020 及 2019 年頭發表嘅簡報文件，整理咗近呢四年外匯基金嘅投資表現，俾大家參考一下。
| 2016 至 2019 外匯基金投資成績表（億港元） | ||||||||
| 年度 | 2019 | 2018 | 2017 | 2016 | ||||
| 債券 | + | 1,144 | + | 574 | + | 344 | + | 331 |
| 香港股票 | + | 221 | - | 207 | + | 583 | + | 53 |
| 其他股票 | + | 1,003 | - | 387 | + | 804 | + | 286 |
| 外匯 | - | 130 | - | 90 | + | 535 | - | 158 |
| 其他投資 | + | 234 | + | 219 | + | 374 | + | 169 |
| 總投資收入 | + | 2,472 | + | 109 | + | 2,640 | + | 681 |
值得留意嘅，喺横觀幾年成績，都喺債券最為亮麗，年年賺錢之餘，仲有穩定、可觀嘅增長。THAT'S WHY 上次我以「穩定、可觀」嚟形容自己舊年嘅回報，應該都唔使點 PROVE。而我諗亦冇必要再去解釋，點解我會話，沽債轉股，喺 NO TIME IS RIGHT TIME 啦！
舊年香港內憂外患，中美貿易戰加黃黑之疫，都無阻外匯基金賺大錢。中美貿易戰，影響咗貨物嘅流動，而黃黑之疫、肺炎之疫，就影響咗人嘅流動，但兩者對資金嘅流動，全無影響。資金從來都喺流向有機遇嘅地方，實業艱難，就自然走哂去投資市場度，真喺你有你抗疫，人地有人地炒高炒低，個市都唔知幾旺場。香港呢個國際金融中心，果然喺唔嘢少。
各位可能會埋怨，呢個世界，點解咁唔公平？我想反問大家，天，即喺呢個大自然，幾時有話過，世界喺公平呢？物競天擇，適者生存，先至喺大自然嘅真正定律，而唔喺乜嘢公平、乜嘢人權。仲有，唔好忘記，正正就喺呢個國際金融中心，撐住我地成個香港，上至金融地產，下至零售甚至到街市買餸，無不受惠於呢個重要地位，冇呢條巨柱頂住嘅話，香港咪仲大鑊！
抗疫之道、長勝之道
從來傷害，都喺先下而後上，利益，就喺先上而後下，呢個喺現實。對於現實，我地只能夠面對、接受，以現實為基礎，做好自己，力爭上游。所謂攬炒，傷嘅，全部都喺基層，班黃黑之徒，真喺唔好咁天真。我地對抗黃黑之疫，同對抗肺炎一樣，喺要全面否定佢地，而唔喺俾佢地感染。如果你用以其人之道，還治其人之身嘅手法，咁你同佢地，又有何分別呢？只要全民做好自己，遠離黃黑，以黃黑為鑑，久而久之，佢地就會被孤立，同失去存在意義，到其絕望之日，就喺康復之時。
最後，我想同大家分享【龍心】嘅一段講話，翻譯如下。
「從每一個富有、成功的人，一定可以學習到一些，不要只懂罵他們邪惡。如果你想改變世界，不是花能量去罵他們邪惡，而是去令自己富有、健康，才能夠影響他人、給予他人生命、給予他人機會，而不是給予錢。」
踏入正月最後一個星期，我希望大家謹記，正能量，先至喺長勝之道。
祝各位，身體健康，心想事成，一團和氣，大吉大利！
＊ 註：按 藍色連結 開啟或跳至相關之參考資訊；
按 紫紅連結 跳至文章頂部播放相關影片。
