《投資篇》之後，大大話話，又過咗足足八個月。
呢段期間，香港起咗翻天覆地嘅變化，真喺勢估唔到，《核彈篇》會响個咁嘅社會環境之下發表。我話過出文與否，從來都喺睇 MOOD，一連串社會事件，無疑影響我完成呢個系列嘅心情，亦令我花唔少時間，寫咗啲同黃黑事件相關嘅文章，而最近仲爆埋啲唔知乜肺炎，可謂 NO TIME IS RIGHT TIME。不過依家問題似乎喺，我寫嘢，究竟有幾多人睇得明？記得曾經有幾位朋友、網友，都話過我寫啲嘢，好深，或者好玄。其實要明白我嘅文章，都唔喺太難啫，但最起碼，我付出咗之餘，你都要付出返少少。我當然唔喺講錢，至於喺啲乜，就唔再重複啦！
精英、腦殘
不過少人明白，都未必喺壞事，反正精英，從來都喺少數。哈哈！我喺咪好自大？其實我所指嘅精英，唔一定喺啲好高學歷，或者响社會上身居要職、有頭有面嘅人。講真，如果你只能夠以單一角度睇事物嘅話，咁就算你知識水平幾高、分析能力幾強，你嘅知識同分析能力，都只會成為強化你單一角度嘅工具啫。呢種人，我較早前一篇文章裡面都有剖析過，就喺所謂嘅「獨角腦殘」。
無疑呢個世界，喺充滿假象，同無數謬誤，不過好似 831 死咗人啲咁低級嘅大話，都竟然會有人信到十足，獨角個腦有幾殘，真喺唔使多講。所以有時我都會諗，使唔使降低一下文章嘅難度？但睇嚟，對住果班腦殘，應該點降都冇用。不如講白啲，如果你喺呢種人嘅話，咁我就奉勸你，無謂再浪費時間睇落去，我啲文章又長又難明，你睇幾多次都唔會知我寫乜。
講開又講，唔知大家仲記唔記得，林子健事件？相信泛民裡面，佢都可謂最唔抵果件，依家日日撞牆，痛恨自己聰明一世，就喺輸咗個 TIMING。如果佢早排先至嚟玩自釘嘅，莫講話大把人信，玩下手仲隨時做埋區議員添。我唔喺講笑，睇返最近區議會選舉，建制大敗，攞唔夠兩成議席。呢次泛民連同激進派，借勢將選舉硬推成變相公投，啲黃黑支持者可謂傾巢而出，舉哂啲珍禽異獸入區議會。不過，對比相對政治冷感嘅其他選民，都破唔到六比四，就證明咗香港，仲未至於冇得救。
各位，我喺好認真，今日香港，至少有 120 萬個精英撐住，算喺咁啦！
末日博士
其實一個社會，喺唔需要個個都好叻，皆因每個人都有自己嘅角色，多一個叻嘅腦殘，都只喺多咗隻害虫啫。响呢個時勢之下，仲可以保持清醒嘅，就算只喺個冇乜學識嘅師奶阿叔，都已經喺社會嘅精英。可能你會覺得，我對精英嘅要求太低，咁不如我問下大家，成日上鏡果位末日博士，算唔算喺精英？
關於佢過往啲末日預測有幾準，就唔方便評論啦，揭人瘡疤呢家嘢，唔喺我杯茶。不過佢離職之後，喺咁唱自己舊公司，就真喺幾冇風度。講真，如果我喺行家，見你副咁嘅格，都唔夠膽請你，唔好講到人地歧視你喺香港人。响交銀做咗成十四年，如果人地真喺好似你話，咁介意港人代表中資銀行發言嘅，你邊坐得上首席經濟及策略師呢個位？你以前果啲出位言論、預測失準，人地唔介意，都已經好包容，點解唔檢討一下自己，有冇作出過啲 FATAL 嘅言論或者行為，影響到公司利益，搞到人地唔炒你唔得？
末日博士又話，對中國嘅負面分析，例如「看淡內地經濟、中方在中美貿易戰處下風」等言論，受到打壓。呢啲一面之詞，好難評論，但我都問過下啲業界人士，似乎冇乜聽過話有咁嘅事。其實，依家全球各大經濟體，都冇乜邊個撈得好掂，尤其喺啲民主國家，一個個步入「陣痛」階段。反觀中國內地，社會相對穩定，人民向心力強，政策執行效率又高，就宏觀而言，睇淡內地經濟，根本就唔現實。至於中美貿易戰，邊個佔上風，邊個佔下風，好多時都喺角度問題。我反而 WONDER，呢位末日精英，喺咪唔知唔覺，變咗做腦殘？
心水太清
所以點解我話，對啲評論員嘅言論同文章，喺應該當「散文」咁去睇。睇散文，當然唔可以太認真，散文當明燈嘅話，就真喺十條命都唔夠死。我唔喺講笑，啲師奶阿叔，心水夠清嘅話，炒股隨時準過啲唔知乜博士，真喺唔好話啲師奶阿叔，唔可以喺精英。我知你地一定會問，點先至算心水清？呢個問題，唔喺三言兩語就答得哂，不過有一點可以透露：心水清嘅首要條件，就喺具多角度睇事物嘅能力。咦？我又算唔算心水清呢？答案喺 YES！咁有乜股票介紹呀？SORRY，股票呢家嘢，我從來唔 BUY。車！仲唔喺老吹？NO！我唔 BUY 股票，就喺因為心水太清囉！ 心水唔清，不宜炒股；心水夠清，可以炒股；心水太清，唔 BUY 炒股。
哈哈！喺唔喺好難明？無他嘅，講得太白，邊有趣味。認識我嘅人都知，我嘅投資組合，主要喺以債券及有關債券類別嘅高息金融項目為主，當中幾乎全部都喺中港地區嘅資產。至於啲歐美鬼佬嘢，就真喺唔好搞我，低增長嘅成熟經濟體，就算俾到息都喺燒俾你。不過，唔少人始終擺脫唔到果種崇洋心態，西方嘅月光總喺圓啲，有平嘢就一窩蜂去撈。當然，你要用自己啲血汗錢，去供養人地嘅民主自由，我唔阻你，但唔好怪我烏鴉口，玩下手，「陣痛」隨時變長痛！
陣痛嘅威力
我唔喺講笑，就睇法國，黃背心玩咗成年幾都未停，最近仲搞埋大罷工，真喺唔知點收科。上次唔使一個月，就撤咗個燃油稅，人地咪一樣照玩，真喺有板你睇。所以話呢，妹仔真喺唔夠醒目，一喺就晨咁早撤咗個修例，再唔喺嘅，响四月中見個主席位卡住咗，咪即上大會，暑假前埋佢單囉！反正妳洗濕咗個頭，撤又好，唔撤又好，硬過也好，人地照樣發癲，有乜分別？話說近七成法國人，認為罷工合理，我地香港，就有近六成投票者，支持黃黑。唔好話我阿 Q 精神，相比之下，我地都叫好過人地少少啦！
其實近三年前，我已經提出咗過警告，環球經濟新常態嘅陣痛，會席捲全球，包括我地嘅香港。但好可惜，我睇好果兩件，就跌哂眼鏡。第一件，我曾冠以「港式馬克龍」之名嘅鬍鬚曾，最後淪為「過氣大師」；至於第二件，我曾冠以「法式鬍鬚曾」之名嘅馬克龍，就一朝得志，語無倫次，對國內嘅陣痛，掉以輕心，成日掛住响外交上威威。唉！冇法啦，兩位都有化解陣痛嘅底子，但一個年紀太大，另一個就太年青。記得我曾經話過，陣痛，可以維持幾年，至十幾年，甚至更長，亦因地區而異。所謂，新常態嘅第三階段，唔知我有生之年，可唔可以見得到？
所以有時候，都真喺幾沮喪，我啲預言，好嘅唔靈，醜嘅就靈哂。香港人嘅報應、思歪主義崛起、泛民壯大、年輕人成魔，我真喺唔想再數。我曾寄語持份者，唔好為咗眼前嘅利益，搞到將來嘔突。依家都只喺區議會，傷嘅都仲喺基層，但到立法會都被全面攻陷嘅話，持份者，就要付出代價。好彩我呢份人，唔鍾意高調啫，唔喺分分鐘俾人封咗做新末日博士，就真喺大大鑊，呢啲咁嘅臭名，千祈唔好搞我！
現在嘅基礎因素
咁究竟香港，仲有乜嘢出路？關於呢個新年錦囊，我會稍後再提返。其實將來嘅局勢，點樣發展，我做投資嘅，你開大，我行 A 路，開細呢，咪行 B 路囉！LIFE WILL FIND ITS WAY。不過，作為長線投資者，每落一注都好長遠，持貨亦喺斷年計，所以一定要心水好清，對「現在嘅基礎因素」，即喺唔會隨便受市場變化影響嘅長期因素，就要睇通睇透。
記得 2014 年 9 月初，我發表咗一連四節嘅《環球經濟新常態》回應系列，裡面提到果種薄利多銷嘅環球金融結構，就喺我當時見到嘅「現在嘅基礎因素」，低息成為常態，而高息嘅定義，亦唔會再喺以前果種高。結果年幾之後，即 2015 年底，美國開始加息，聯邦基金利率由 0.25 厘，經歷三年共九次加息，到 2018 年底嘅 2.5 厘就結束。半年之後，即 2019 年 7 月底，美國開始調頭減息，減咗三次到依家嘅 1.75 厘。
當年有啲磚家、財演，將美國加息講到好似洪水猛獸咁，因為佢地認為，如果唔喺聯繫匯率阻住個地球轉，香港早就應該要加息，所以美國一加息，佢地就預期香港一定會跟，到時候樓市就會大跌。點知呢班所謂磚家、財演，個個跌哂眼鏡，人地加到第八次，香港啲銀行，先至勉強將個 P 加得果 0.125 厘，到人地調頭減到第三次啫，就連果少少都要減返。OBVIOUSLY，根本喺香港自己嘅問題，唔好話我馬後砲，早响 2013 年底，我就已經話過，喺香港自身嘅經濟結構，冇條件加息，關個聯匯 Q 事！
七年投資回顧
正正就喺睇通咗呢個「現在嘅基礎因素」，先至會瞓哂身去建立我嘅投資事業，成就三個十倍。咁究竟呢七年以嚟，我嘅戰績如何？就用返當時舉過嘅一個例子，市值 300 萬磚頭，按八成融資 240 萬。大家可能會問，2013 年到依家，300 萬嘅磚頭，都應該已經升到 600 萬以上啦！不過我响《投資篇》裡面已經提過，2015 年金管局收緊咗對融資投資嘅監管，磚頭融資唔可以再槓桿。咁我就當升到 450 萬就唔再繼續加按，即喺個基礎融資升到 360 萬就停。當時我話以五至七成，即喺平均六成槓桿買債，但事實上我嘅槓桿比例，好快就已經升到平均七成。以 360 萬基礎融資，持貨 1200 萬債券類資產，平均收息 8.5 厘，借貸成本 2.5 厘，複息增長七年至 1800 萬，扣除借貸嘅話，就喺淨賺 600 萬。
市值 300 萬磚頭，七年投資，淨賺 600 萬，未計磚頭升值同租金收入。呢個只喺粗略計算，仲有一系列其他成本支出，以及同銀行合作，衍生出嚟嘅商機，所導致嘅其他收入。再者，我嘅原始磚頭資產，又何止 300 萬？都喺果句啦，私隱嘢，唔方便透露。其實呢七年期間，外面好多評論，甚至一啲朋友，FROM TIME TO TIME 都會講乜沽債轉股，但對我而言，NO TIME IS RIGHT TIME。要我沽債轉股，即喺要放棄槓桿，走去玩以小搏大，講真，我寧願騎住呢隻「現在嘅基礎因素」，順風飛馳，幾悶蛋都喺咁話啦，鬼叫我心水太清咩！
呢個世界，冇人有水晶球，如果你喺《股樓篇》尾講果種，揸住隻唔知乜股，就以為自己揀中咗件荀馬嘅，咁我就奉勸你，真喺要小心啲，唔好以為中美貿易第一階段簽咗，就一天都光哂。成個中美矛盾，响環球主導之爭，仲未塵埃落定之前，喺唔會停止，所以呢個世界，至少會動盪五至十年以上。再加上「陣痛」漫延全球，就算唔喺啲乜嘢黃黑暴亂、唔知乜肺炎之類，個市場都會好波動，同充滿不明朗性。
2019 投資成績表
所以點解我話，睇清楚「現在嘅基礎因素」，包括以上提過嘅薄利多銷環球金融結構、長期中美矛盾、以及持續纏擾各地嘅「陣痛」，對投資者喺非常重要。因為無論市場有幾動盪、幾難預測，都喺坐落响呢堆可見嘅未來，都唔會改變嘅長期因素之上。而呢啲因素，就算喺改變，都只會漸變，心水夠清嘅長線投資者，唔難觀察得到，亦有足夠時間作出調整。
THAT'S WHY 我以「悶蛋」嚟形容囉！不過悶蛋，亦可以好忙，呢方面上次已經提及過，唔再重複啦。或者簡單啲講，自 2018 年中啟動咗個「盾」之後，我資產嘅防禦力大大提升。2019 上半年債市暢旺，可以放膽增持，而下半年就喺保本期，至於全年嘅成績表，雖然仲未計出嚟，但已經可以肯定，回報喺穩定、可觀！
到 2020 年頭，債市開始回升，呢次我可能會玩玩新意思，不過就仲未敲定。正如上一節我都提過，同銀行持續合作，喺會衍生出一啲商機，就好似 2017 年中至 2019 年底，美元對港元轉強，港匯多次觸及 7.85 弱方兌換保證。响呢兩年半期間，我地就開咗個涉及都幾大額度嘅投資項目，但作為商業機密，唔可以公開透露，惟一可以講嘅，就喺同聯繫匯率有關，所以我地對於聯匯，都有一啲體會。 聯繫匯率
其實貨幣呢味嘢，本身就極具投機性，尤其香港呢個資金可以自由出入嘅國際金融中心，大手資金流出流入，有乜咁出奇？芳間有部份財演，日日盯住港匯同拆息呢兩個數字，有乜風吹草動，就大造文章。都喺果句啦，呢啲只能夠當散文咁去睇，散文當明燈嘅話，就真喺十條命都唔夠死。或者簡單啲講，港匯反映港幣同美元之間嘅兌換需求，而拆息就反映港幣嘅借貸需求。兩者嘅關係，可以齊上齊落，亦可以各行各路，要視乎當時嘅個別情況，唔可以一概而論。
創立聯繫匯率嘅目的，就喺要簡化呢一系列貨幣關係，將港匯守住响 7.75 至 7.85 之間，防止大量資金嘅流出流入，衝擊到本土經濟。其實，真正要動用到外匯儲備捍衛嘅，只喺得 7.85 呢個弱方兌換保證，因為要保住 7.75，發行多啲港元就得。所以美國行低息同量寬果一段長時間內，港匯推至貼近 7.75 強方兌換保證，喺有利於香港嘅貨幣，以及金融體系嘅穩定性。
年幾之前，過氣大師响一個訪問裡面，被問到中美貿易戰，會唔會引發金融風暴果陣，提到當時香港嘅外匯儲備，三萬億唔夠找一萬億，意思即喺話，要捍衛聯繫匯率，以當時一萬億港元嘅貨幣基礎，就需要等值 7.8 萬億港元嘅外匯儲備，咁三萬億就梗喺唔夠找啦。再睇埋另一位，當年未過氣嘅沙皇，响 97 金融風暴後，2001 年發表嘅一篇網誌度，話香港需要嘅外匯儲備，原來仲要高過呢個最低嘅理論水平添！
金融核彈
不過咁，上萬億呢啲天文數字，恐怕都冇乜邊隻大鱷玩得起。你用個巨 SIZE 嚟震懾對手，正常情況之下，當然冇問題。但大家又唔好咁腦定住，上次我都講過，SIZE，只喺得個大字，如果你撞正一個有 SCALE 嘅對手，就唔喺咁簡單啦！好似美國總統，彈指之間，一毫子都唔使出，就可以釀成災難。記得預告《核彈篇》果陣，我話整個畫面，其實唔太複雜，一個中興事件，就已經可以睇穿哂。
當時中興之所以咁危，喺因為佢嘅關鍵供應鍊，喺嚟自美國，只要供應鍊一被切斷，中興就 GAME OVER。香港嘅情況，其實都喺一樣，港幣掛勾美元，令美元成為香港金融體系嘅關鍵供應鍊，美國要搞你香港，真喺一毫子都唔使出，只要切斷呢條供應鍊，你就 GAME OVER 啦！我唔喺講笑，所謂「核彈」，就喺指聯繫匯率。2018 年 4 月底，我响某 WHATSAPP 群內，第一次提出核彈，當時我話唔會出可以引發核彈嘅文章，喺唔想觸動不明嘅蝴蝶效應。就睇個半月前，有人提出過類似嘅言論，搞到阿茂都唔知幾緊張。我呢份人，唔鍾意高調，又最怕麻煩，太早發表嘅話，容乜易俾人擺上枱，到時就真喺大大鑊。
不過大家可以放心，我喺講核彈，唔喺核爆，好多國家都有核彈啦，又唔見世界未日？只喺香港呢個金融核彈，個開關掣响人地果度，你唔拆彈，遲早出事。可能你會問，美國佬，有冇咁癲？最近特佬派無人機，炸死伊朗軍官蘇萊馬尼，都只喺一個莫須有，美國佬，有乜嘢做唔出？當年小布殊出兵伊拉克，老屈人地有大殺傷力武器，咪又喺一個莫須有。所以唔好以為只喺特佬嘅問題，民主共和兩黨，一致支持貿易戰、一致通過香港人權法，主流美國人，普遍都唔妥我地中國人。無他嘅，你要登上一哥呢個寶座，影響到美國嘅基礎利益，就算換咗喺奧巴馬，都唔會肯過你啦！
痴人說夢嘅泡湯
今日美國佬唔噤呢個掣，當然唔喺俾面你香港人，只喺有好多美國企業，响呢度賺緊錢，除咗龐大嘅貿易順差之外，仲可以响金融市場 CAP 水，呢個又喺一隻「現在嘅基礎因素」。不過，人地今日唔郁你，唔代表他日唔會，個掣始終响人地果度。當年我剎停個海外客，就喺因為個掣响人地度，而我又發現同佢之間「現在」嘅合作，原來跟自己一向嘅理解唔一樣。隨著中西對決，漸趨白熱化，美國，甚至美元，逐漸失去領導嘅地位，到時機成熟，人地就會毫不猶豫咁，一手拍落個掣度，殺你一個措手不及。但正如剛才我話，「現在嘅基礎因素」，就算喺改變，都只會漸變，俾足時間你準備。可惜我地嘅政府，多做多錯、少做少錯、不做不錯，尤其喺妹仔上場之後，所謂「管治新風格」，即喺比官僚，更官僚！
一日最衰都喺個 CY，你冇得連任，都搵個醒目啲嘅嚟接棒啦！如今修例搞到一鑊粥，就喺因為唔夠決斷，人地行咗十步，妳都行唔夠一步。內會停擺咗成三個月，一早將《國歌法》抽出嚟直上大會，個內會咪選得出主席囉！反而將個產假草案繞過內會，根本就喺本末倒置，到時候乜叉草案，都要逐個抽出嚟繞過內會，搞到最後頂唔順先至抽起《國歌法》。真喺唔好話我烏鴉口，拖到臨近立法會選舉，又一個修例翻版！
想當年，我話改革聯匯，以港元頂上國際貨幣嘅地位，睇嚟呢個「痴人說夢」，應該可以攞嚟泡湯。香港市民，咁樣對自己嘅祖國，阿爺仲點會再指擬你？但家陣要拆呢個金融核彈，似乎已經由「痴人說夢」，變成燃眉之急，要指望個咁官僚嘅政府，應該冇乜希望，我地香港市民，惟有食自己啦！
CHOOSE YOUR SIDE
咁即喺點？CHOOSE YOUR SIDE 囉！呢個就喺我 2020 年俾大家嘅新年錦囊。其實自 2015 年起到依家咁多年以嚟，我响好多篇文章裡面，都多少提及過呢個錦囊。總之，對中國人而言，任何同美國，以及美國盟友有關係嘅投資、生意，甚至喺交流，以及一切瓜葛，都已經變成極高風險。我唔喺講笑，就算你移民咗去美國，成為正式嘅美國公民，只要你喺中國血統，人地都唔會當你美國人。正如華裔科學家，接觸到一啲科技，就算只喺為咗學術或者技術需要，唔喺乜嘢間諜，都可能會惹上官非，但如果喺一個鬼佬，做同一樣嘢呢，又唔會有事喎！
雖然好無奈，但呢個喺現實，華人移民到美國，以及美國嘅盟友國家，都只會俾人當做二等公民。以前澳洲、加拿大，喺華人嘅移民天堂，如今美國要打壓華為，第一時間舉手附和嘅，就喺呢兩個國家，真喺諷刺！响果邊生活嘅中國人，包括香港人，唔會有運行，人地最終都會排斥你。世界上每一個國家，都要被迫 CHOOSE THEIR SIDE，就睇杜魯多，竟然斗膽話，如果美國冇搞中東，烏克蘭客機裡面果 57 個加拿大人就唔會死。唉！算吧啦！你可以點？放咗孟晚舟囉，你敢咩？美國，FRIEND 嚟嘛！
講開華為，上星期六，我正式由 iPhone 6 Plus，轉咗用華為 Mate 30 Pro。呢部新手機對我嚟講，意義重大，除咗因為佢喺華為最新嘅旗艦型號之外，仲喺美國打壓華為之下，受影響嘅第一部手機，唔 SUPPORT GOOGLE，而我亦寧願唔要 GOOGLE，都唔會好似一啲人咁，用旁門左道夾硬裝返上去。雖然愛國愛港人士，唔一定要用呢部手機，但用得呢部手機嘅香港人，唔會喺黃黑之徒。有朋友甚至叫我小心啲，唔好咁招搖，當心俾黑衣人打喎！哈哈！邊有咁誇？ 其實你用乜嘢手機，唔緊要，但就一定要 CHOOSE YOUR SIDE。有網友話，走為上着，我想問，你走得去邊？留返响香港，阿爺會照住你，唔喺嘅，返內地又得，YOU ARE WELCOME！講真，做香港人，都算好幸福啦！但如果你喺要揀忘本嘅，都喺果句，唔會有好下場，去到天涯海角，都只會喺二等公民，仲要去唔到澳門，返唔到內地，即喺話留响香港，都一樣喺二等公民！
結語
各位，我已經警告過好多次，唔好話我冇預先通知。「核彈」唔喺最恐怖，就算呢個官僚政府，做唔到啲乜嘢，大家都仲有足夠時間準備，以及調節自己嘅投資。CHOSEN THE WRONG SIDE，先至喺最恐怖，天下兩分之局，已經成形，站錯邊嘅話，就真喺十條命都唔夠死！
話時話，呢個系列嘅主題，都真喺幾衰，我唔鍾意正月流流寫衰嘢，所以一定要响過年之前，趕起呢篇文章。《十條命都唔夠死》系列，終於正式完結。
預祝大家鼠年，身體健康，心想事成！
